മിനിക്കഥകള് മിനി പി സി
മ്യൂട്ടേഷന്
ഗലികളിലെ കുപ്രസിദ്ധരുടെ
ചോര കുടിച്ചാണ് അവന് വളര്ന്നത് . കൊമ്പുകളുടെ , ക്രൗര്യവും മൂര്ച്ചയും അളവിലധികമായ ഒരു സന്ധ്യയില് അവന് തന്റെ
പതിവ് വഴിയൊന്നു മാറ്റാന് കൊതിച്ചു . ...ശബ്ദമുഖരിതമായ രാത്രിയുടെ അലോസരങ്ങളിലൂടെ ഒത്തിരിയലഞ്ഞാണ്
അവന് ഒരുവളെ കണ്ടെത്തിയത് .ഉറങ്ങുമ്പോള് പോലും പുഞ്ചിരിതൂകുന്ന അവളുടെ നിഷ്ക്കളങ്കമായ
ചുണ്ടുകളില് നിന്ന് മതിയാവോളം ചോരയൂറ്റിക്കുടിച്ച അവന് പിറ്റേന്ന് തനിക്ക്
ചുറ്റും കൂടി നിന്ന് ചങ്ങാതിമാര് “ മ്യൂട്ടേഷന്...മ്യൂട്ടേഷന്
” എന്ന് ആര്ത്തു വിളിക്കുന്നത് കേട്ടാണ് ഉറക്കമുണര്ന്നത് . കാര്യമെന്തെന്നറിയാന്
ഒരു ചങ്ങാതി നീട്ടിയ കണ്ണാടിയിലെ തന്റെ രൂപം കണ്ട് അവന് സ്തബ്ധനായി ....തന്റെ
ശോഷിച്ച ദേഹത്തിനും ക്രൂരത കിനിയുന്ന കൊമ്പുകള്ക്കും പകരം പറക്കാന് മാത്രമറിയാവുന്ന ഒരു സ്വര്ണ്ണത്തുമ്പിയായി
താന് മാറിയിരിക്കുന്നു !
റാഗ്ഗിംഗ്
അന്ന് അമ്മ പ്രാര്ഥിച്ചത്
തന്റെ മകനെ റാഗ്ഗിംങ്ങില് നിന്നും കാത്തോളണെ എന്നായിരുന്നുവെങ്കില്
ഇന്നവര് പ്രാര്ഥിച്ചത് മകന്റെ റാഗിംഗ് ക്രൂരതകളില് നിന്നും മറ്റു
കുഞ്ഞുങ്ങളെ കാത്തുരക്ഷിക്കണേ..എന്നായിരുന്നു !